Dúas compañeiras nosas na selección galega de voleibol
Dúas estudantes do IES de Quiroga, Sofía Pérez Carballedo e Carolina Camino Fernández, acudiron o mércores 19 de abril ao campionato de España de voleibol, que se celebrou en Valladolid. Sofía xa asistira previamente (a mediados de marzo) a outra concentración, a de Soria, previa ao pre-europeo de Palencia, convocada pola Selección Española sub-16. As dúas xogan no Ribeira Sacra.
O campionato de España finalizou o sábado 22 de abril. Carolina e as súas compañeiras da categoría infantil acadaron un sexto posto, mentres que o equipo de Sofía, xogando na categoría de cadete, quedou no quinto posto.
Aproveitamos a súa presenza no centro para facerlles unha pequena entrevista:
– Como empezaches a xogar a este deporte?
Sofía: Empecei grazas a un profesor de Educación Física que tivemos no colexio.
Carolina: Cando estaba no 2º curso de primaria empezoume a gustar xogar nos recreos cos meus compañeiros. Logo miña nai, ao ver que a min me gustaba este deporte, apuntoume a esta actividade extraescolar. E, enseguida, un adestrador da Rúa, que ademais era o meu mestre de Educación Física, pediume que xogase no seu equipo.
– En que ano comezaches a xogar?
Sofía: Empecei grazas a un profesor de Educación Física que tivemos no colexio.
Carolina: Comecei a xogar aos oito anos, alá polo 2010.
– Cres que te dedicarás a este deporte profesionalmente?
Sofía: Non sei, é bastante difícil chegar a xogar profesionalmente, pero con dedicación e esforzo podería ser.
Carolina: Si, gustaríame moito.
– Alguén na tua familia xa practicara este deporte?
Sofía: Non
Carolina: Miña nai xogaba a este deporte no colexio, nos recreos, pero ela dedicouse máis ao baloncesto.
– Como foi para ti xogar o teu primeiro partido?
Sofía: No primeiro partido que xoguei enteiro sentíame moi nerviosa porque nunca antes fixera ningún tipo de deporte e temía facelo mal.
Carolina: Acórdome de que no meu primeiro partido eu era moi pequena, e non me daba conta de que era un partido. A min dixéronme: “Veña, pon esta equipación e sae aí a xogar. E eu non sabía que estaba xogando contra outros nenos para competir, pensaba que estabamos xogando.
– Como é a relación coas compañeiras do teu equipo?
Sofía: Nunca tiven ningún tipo de problema co resto de compañeiras.
Carolina: Non teño ningún problema con ningunha das miñas compañeiras, é máis, lévome ben con todas, pero teño máis confianza con algunha delas.
– Que sentiches ao saber que foras convocada pola Selección Española á concentración de Soria/Valladolid?
Sofía: Sentíame orgullosa porque valoraron todo o esforzo que levo facendo nestes anos pero tamén sentía nervios porque alí hai un nivel moi alto e nunca xogara con xogadoras de tanto nivel.
Carolina: Sentín moita felicidade, porque é unha gran oportunidade para min.
– Podes facer unha pequena valoración desa experiencia, tanto no personal como no deportivo?
Sofía: A experiencia pareceume positiva porque personalmente eu son unha persoa á que lle custa moito falar con xente e puiden aprender que iso non soe ser bo. Deportivamente aprendín bastantes cousas que nun club normal non che soen dicir.
Carolina: Para min foi unha experiencia moi boa. No personal porque coñecín moita xente contra a que xogo no campionato galego. Conxeniamos moito á hora de xogar e levámonos moi ben. E no deportivo foi unha oportunidade competir a nivel máis alto con todo o que se aprende diso. Tivemos algunhas pequenas derrotas, pero non o tomamos moi mal, é dicir, o pasado pasado está, a polo seguinte. E tamén gañamos moitos partidos.
De cinco partidos gañamos tres e perdemos dous; gañamos contra Valencia, Castela e León, e contra Estremadura, e perdemos contra Madrid e contra Baleares.
En xeral, foi unha moi boa experiencia, tanto se perdemos como se gañamos. Quedamos de sextas, que para ser o campionato español, non está nada mal.
Que lle dirías a alguén que se inicia neste deporte?
Sofía: O único que lle podería dicer é que se de verdade lle gusta ese deporte, que non o tome como un pasatempo, e que lle poña moito esforzo.
Carolina: Tes que adestrar moito e ser a mellor en todo o que fagas, e loitar por ser a mellor, pero ante todo disfrutar do tempo que pases xogando.
Tes medo ás lesións?
Sofía: Nunca tiven ninguna lesión que non me permitira poder xogar, pero un pouco de respecto si que lles teño.
Carolina: As lesións non me preocupan porque son cousas do deporte, e non soen pasar moi frecuentemente.
Cantas horas lle dedicas ao volei á semana?
Sofía: Adestro 6 horas á semana.
Desexámoslles moito éxito na súa traxectoria deportiva a estas dúas compañeiras. Noraboa!
Adrián Vilariño Fernández (4º ESO)
